चैत १७ सुर्खेत। भाेलि मध्यपश्चिम विश्वविद्यालयमा स्वतन्त्र विद्यार्थी युनियन (स्ववियु) को निर्वाचन हुँदैछ । विश्वविद्यालयको पछिल्लो निर्वाचन मिति चैत १८ गते तोकिएको थियाे । निर्वाचनमा सहमागी हुने नौ वटा संघसंघटना दर्ता भएका छन् ।
निर्वाचन समितिका अनुसार नेकपा एमाले निकट अनेरास्ववियु, नेकपा माओवादी केन्द्र निकट अखिल (क्रान्तिकारी), नेपाली कांग्रेस निकट नेपाल विद्यार्थी संघसहित नेकपा (एकीकृत समाजवादी), राप्रपा, नेमकिपा, मसाल, नेकपा बहुमत, नेपाल कम्युनिष्ट पार्टी लगातका दलसम्बद्ध विद्यार्थी संघसंगठनहरुले निर्वाचन सहभागिताका लागि संगठन दर्ता गराएका छन् ।
विश्वविद्यालयमा हाल कुल ४ हजार ३८३ मतदाता रहेका छन्। विश्वविद्यालयमा १७ सदस्यीय स्ववियु कार्यसमिति रहने व्यवस्था छ । विश्वविद्यालयको स्ववियु निर्वाचन कार्यविधिअनुसार अध्यक्ष, सचिव र कोषाध्यक्ष गरी ३ जना पदाधिकारी र ७ जना सदस्यहरु प्रत्यक्ष निर्वाचन प्रणालीमार्फत चयन हुन्छन् । अरु ७ जना सदस्य समानुपातिक निर्वाचन प्रणालीमार्फत चयन हुने व्यवस्था कार्यविधिले गरेको छ ।
निर्वाचनको दुवै प्रणालीबाट चयन भएको १४ जना सदस्यमध्येबाट दुई जनालाई पदाधिकारीमा कार्यसमितिले मनोनयन गर्न सक्ने व्यवस्था छ। चयन हुने दुई जनामध्ये एक जना उपाध्यक्ष र एक जना सहसचिवका रुपमा मनोनित हुन्छन् ।
यो प्रणालीपछि स्ववियु कार्यसमितिमा पाँच जना पदाधिकारी र १२ जना सदस्य हुन्छन् । अहिलेको निर्वाचनमा नौवटा दलहरु चुनावी मैदानमा उत्रिएपनि प्रमुख प्रतिस्पर्धा अनेरास्ववियु, अखिल (क्रान्तिकारी) र नेविसंघबीच हुने देखिन्छ । यी तिनै संगठन एक्लाएक्लै चुनावी मैदानमा छन् ।
एमाले निकट विद्यार्थी संगठन (अनेरास्ववियु) बाट संगठनका कोषाध्यक्ष जगतजंग शाही अध्यक्ष पदका उम्मेदवार छन् ।
उच्च शिक्षको गुणस्तर सुधार, छात्रवृत्ति कोष स्थापना, प्रविधिमैत्री कक्षा सञ्चालनको एजेण्डा बनाएको अनेरास्ववियुबाट सचिवमा भूपेन्द्र भण्डारी, कोषाध्यक्षमा विक्रम सिं मन्दिर मगर उम्मेदवार छन् ।
माओवादी निकट अखिल (क्रान्तिकारी) बाट प्रकाश विक अध्यक्षका उम्मेदवार छन् । सीपयुक्त, प्रयोगात्मक, अनुसन्धानमुलक र व्यावहारिक उच्च शिक्षाको एजेण्डा बोकेको यो संगठनबाट सचिवमा मोहन चौलागाइँ, कोषाध्यक्षमा दीप बहादुर सुनार उम्मेदवार छन् । रेखा बोहरा, रमेश शाही, संस्कृति विष्ट, गगनबहादुर थापा, रोशन रोकाया, जनक बुढा, निश्चल बस्नेत सदस्य पदका उम्मेदवार छन् ।
नेविसंघबाट विवेक खड्का अध्यक्ष पदका उम्मेदवार छन् भने सचिवमा भूपेन्द्र आचार्य, कोषाध्यक्षमा लोकप्रसाद रिजाल उम्मेदवार छन् । सदस्यहरुमा विकासकुमार थापा, निशान्त शाही, शिव ढकाल, गणेश थापा, प्रतिक्षा थापा, विष्णुराज सिंह, प्रकाश सिंह उम्मेदवार छन् ।
विद्यार्थीको अनिवार्य निशुल्क स्वास्थ्य बीमा, चमेनागृह निर्माण तथा सञ्चालन, हरेक आंगिक क्याम्पसमा आवश्यक उपकरण र स्वास्थ्यकर्मीसहितको हेल्थ सेन्टर लगायतका एजेण्डा नेविसंघले अघि सारेको छ ।
मध्यपश्चिम विश्वविद्यालयमा २०७३ साल भदौमा पहिलोपटक स्ववियु निर्वाचन भएको थियो । त्यसबेला नेविसंघका झक्कबहादुर शाही सभापति बनेका थिए। उक्त कार्यसमितिको कार्यकाल नसकिँदै तत्कालीन उपकुलपति उपेन्द्र कोइरालाले स्ववियु विघटन गरिदिएका थिए ।
तत्कालीन रजिस्ट्रार महेन्द्र कुमार मल्ललाई २०७५ मंसिरमा निलम्बन गर्दा स्ववियुले विरोध गरेपछि कोइरालाले विघटन गरिदिएका थिए । त्यसयता विश्वविद्यालयमा स्ववियु गठन हुन सकेको थिएन । यसअघि भदौ २८ गते स्ववियुको निर्वाचन तय भएको थियो ।
मतदानको अघिल्लो दिन उच्च अदालतमा मुद्दा परेपछि स्थगित भएको थियो । विज्ञान तथा प्रविधि संकायका विद्यार्थीले आफूहरुलाई मतदानबाट वञ्चित गराइएको भन्दै उच्च अदालतमा रिट दायर गरेका थिए ।
अदालतले तत्काल निर्वाचन स्थगित गर्न आदेश दिएको थियो । त्यसपछि अदालतले नै चैत २० गतेभित्र चुनाव गरिसक्न आदेश दिएको हो । १० वटा आंगिक क्याम्पस रहेको मध्यपश्चिम विश्वविद्यालयका आङ्गिक क्याम्पसमा चुनाव भइसकेको छ ।
