संकटा क्लबले आहा रारा पोखरा गोल्ड कप फुटबल प्रतियोगिताको उपाधि जितेको छ ।
पोखरामा शनिबार सम्पन्न फाइनल खेलमा भुटनिज युथ एससी अमेरिकालाई ३–२ ले हराउँदै संकटाले उपाधि जितेको हो ।
पोखरा रंगशालामा निर्धारित समयसम्म २–२ को बराबरीमा भएपछि खेल अतिरिक्त समयमा धकेलिएको थियो । सुरज ज्यू ठकुरीले ८ औं मिनेटमा गोल गर्दै संकटालाई अघि बढाएका थिए । मेसुके ओलामोउले ३५ औं मिनेटमा गोल गर्दै संकटाको अग्रतालाई दोब्बर पारेका थिए । त्यसको दुई मिनेट पछि रेने सान्टिलोनले गोल गर्दै भुटनिज युथलाई खेलमा फर्काएका थिए ।
विल्स ग्रिफितले पहिलो हाफको इन्जुरी समयको दोस्रो मिनेटमा हेडमार्फत गोल गरेपछि खेल बराबरको स्थितीमा पुगेको थियो । अतिरिक्त समयको अन्त्यतिर कप्तान सुनिल बलले निर्णायक गोल गरेपछि उपाधी संकटाले जितेको हो ।
बिजेता बनेको संकटाले उपाधिसहित १२ लाख र दोस्रो भएको भुटनिज युथले ६ लाख रुपैयाँ प्राप्त गर्नेछ ।
