छिमेकी मुलुक भारत विश्वको एउटा ठूलो स्मार्टफोन बजारका रुपमा खडा भइरहेको छ । यो सँगै विश्वका दिग्गज प्रविधि कम्पनीहरुले आफ्नो नयाँ कारखाना तथा अफिसका रुपमा भारतलाई रोज्न थालेका छन् ।
भारतमा बढ्दो स्माटफोन व्यापारमा टाटा ग्रुप पनि प्रवेश गर्दैछ । यस विषयमा टाटा ग्रुप र भारतमा आइफोन बनाउने विस्ट्रोन कर्प नामक कम्पनीबीच छलफल चलिरहेको छ । उक्त साझेदारीले मूर्तरुप लिएमा भारतमा टाटा ग्रुपले आइफोन बनाउनेछ । ताइवानी कम्पनी विस्ट्रोन कर्पलाई आफुमा गाभेर भारतमा आइफोन उत्पादनलाई बढाउने टाटा ग्रुपको चाहना रहेको बताइएको छ ।
चीनसँग एप्पलको मोहभंग !
स्मरण रहोस् चीनमा कोभिड १९ को बढ्दो संक्रमणसँगै विभिन्न ठाउँमा प्रतिबन्धहरु पनि जारी छन् । सोही कारण एप्पललाई व्यवसायिक रुपमा नोक्सान भैरहेको छ र ऊ चीनबाट आफ्नो कारोबार बाहिर सार्न चाहन्छ । त्यसका लागि एप्पलले भारतलाई सबैभन्दा उपयुक्त ठाउँको रुपमा महसुस गरेको छ ।
यसको अर्को पहलु पनि छ । एप्पलले हरेक वर्ष चीनबाट भारतमा ३ लाख ७० हजार आइफोन आपूर्ति गर्दछ जुन यो वर्ष करीब ५ लाख ७० हजार गोटा पुग्ने अनुमान गरिएको छ ।
साथै चीनको तुलनामा भारतमा श्रमिकको ज्यालादर तथा अन्य खर्च पनि कम छ । यी सबै चिजलाई मध्यनजर गर्दै एप्पलले भारतमा आफ्ना उत्पादनहरुको निर्माण बढाउन चाहेको छ ।
सन् २०२५ सम्म एक चौथाई एप्पल प्रडक्ट भारतमा बन्ने
विश्लेषक जेपी मोर्गनको रिपोर्ट अनुसार सन् २०२५ सम्ममा करीब २५ प्रतिशत आइफोनको निर्माण भारतमै हुनेछ । अर्को शव्दमा भन्नुपर्दा आगामी ३ वर्षमा विश्वमा बिक्रि हुने एक चौथाई आइफोन मेड इन इण्डिया हुनेछन् ।यहीँ वर्षको अन्त्यसम्ममा मेड इन इण्डिया आइफोनको हिस्सेदारी ५ प्रतिशत पुग्ने बताइन्छ ।
उता भारत सरकारले पनि एप्पललाई चीनबाट आफ्ना कारखानाहरु भरतमा स्थानान्तरण गराउनका लागि हरसम्भव कोसिश गरिरहेको छ । यसका लागि भारत सरकार र एप्पलका प्रतिनिधिहरुबीच लगातार छलफल भैरहेका छन्। एजेन्सीको सहयोगमा
